ငယ်ဘဝဖြတ်သန်းရာ ဒုက္ခသည်စခန်းများဆီအလည်သွားမယ့် UFC ချန်ပီယံ Joshua Van

VOC/ May 14, 2026

ချန်ပီယံတစ်ယောက်ဖြစ်လာဖို့ဆိုတာ ရှည်လျားခက်ခဲတဲ့ ခရီးလမ်းတစ်ခုကို အမြဲဖြတ်သန်းခဲ့ကြရသလို မြန်မာနိုင်ငံရဲ့ ပထမဆုံးသော UFC (Ultimate Fighting Championship) တိုက်ခိုက်ရေးသမား Joshua Van အတွက်လည်း အဲဒီခရီးလမ်းဟာ မလေးရှားနိုင်ငံက ဒုက္ခသည်စခန်းတစ်ခုကနေ စတင်ခဲ့တာ လို့ဆိုရမှာပါ။

ပြီးခဲ့တဲ့စနေနေ့က နယူးဂျာစီပြည်နယ်၊ နယူးဝါ့ခ်မြို့၊ Prudential Center မှာကျင်းပတဲ့ UFC 328 မှာ Van ဟာ ဂျပန်လူမျိုး Tatsuro Taira ကို နည်းပညာပိုင်းဆိုင်ရာ knockout (TKO) နဲ့ အလဲထိုးအနိုင်ယူပြီး သူ့ရဲ့ UFC flyweight ကမ္ဘာ့ချန်ပီယံခါးပတ်ကို ကာကွယ်နိုင်ခဲ့သလို ဘက်စုံသုံးကိုယ်ခံပညာ (MMA) ပရိုမိုးရှင်းမှာ ထိပ်တန်းအဆင့်မှာရှိတဲ့ သူ့ရဲ့နေရာကို ခိုင်မာစေခဲ့ပါတယ်။

မြန်မာနိုင်ငံအနောက်ပိုင်း ချင်းပြည်နယ်၊ ဟားခါးမြို့မှာ မွေးဖွားခဲ့တဲ့ Van နဲ့ သူ့မိသားစုဟာ နိုင်ငံရေးနဲ့ စစ်ရေးပဋိပက္ခတွေကြောင့် အသက် ၁၀ နှစ်အရွယ်မှာ မလေးရှားကို ထွက်ပြေးခဲ့ရပါတယ်။ သူ့မိသားစုဟာ အမေရိကန်ပြည်ထောင်စု တက္ကဆက်ပြည်နယ်၊ ဟူစတန်ကို မပြောင်းရွှေ့ခင်အထိ ဒုက္ခသည်စခန်းမှာ နှစ်နှစ်ကြာ နေခဲ့ရပါတယ်။

Van ဟာ UFC ချန်ပီယံဆုကို ရရှိခဲ့တဲ့ ပထမဆုံး အာရှတိုက်သား အမျိုးသားတိုက်ခိုက်ရေးသမားအဖြစ်လည်း အသိအမှတ်ပြုခံရပါတယ်။ အသက် ၂၄ နှစ်အရွယ်ရှိ Van ဟာ ပြိုင်ဘက်Taira ကို သာလွန်တဲ့ လက်ဝှေ့စွမ်းရည်နဲ့ ထိုးသတ်ကာ ပွဲစဉ်ကို လွှမ်းမိုးနိုင်ခဲ့ပြီး ဒုတိယအချီမှာတော့ ပြင်းထန်တဲ့ ညာလက်သီးနဲ့ မေးရိုးကို ထိုးနှက်ခဲ့နိုင်ခဲ့ပါတယ်။

ကျန်တဲ့ပွဲစဉ်တွေမှာ မျက်နှာနဲ့ ခန္ဓာကိုယ်ကို အကြိမ်ကြိမ် ထိုးနှက်နိုင်ခဲ့တဲ့အတွက် ပြိုင်ဘက်ရဲ့ မျက်နှာမှာ သွေးတွေပေကျံနေတာကိုလည်း မြင်ရပါတယ်။ ပဉ္စမအချီမှာတော့ Van ဟာ ၁:၃၂ မှာ TKO နဲ့ အနိုင်ရရှိခဲ့ပါတယ်။ ဒါဟာသူ့ရဲ့ ၇ပွဲဆက်တိုက်အနိုင်လည်း ဖြစ်ပါတယ်။

Vanက Ariel Helwani Show podcast မှာတော့ သူ့ရဲ့ငယ်ဘဝကုန်ဆုံးခဲ့တဲ့နေရာတွေကို သွားရောက်ဖို့အတွက် လာမည့်အပတ်မှာ ထိုင်းနဲ့ မလေးရှားကို ပြန်သွားမယ်လို့ ပြောဆိုခဲ့ပါတယ်။ မွေးရပ်မြေ မြန်မာနိုင်ငံကိုတော့ ပြန်သွားမှာ မဟုတ်ကြောင်းလည်း ထပ်ပြီး အတည်ပြုခဲ့ပါတယ်။

"မဟုတ်ဘူး၊ အခုအချိန်မှာ မြန်မာနိုင်ငံကို မပြန်နိုင်ပေမယ့် နောက်အပတ်မှာ ရှိနေခဲ့ဖူးတဲ့ ဒုက္ခသည်စခန်းတွေရှိတဲ့ ထိုင်းနဲ့ မလေးရှားကို ပြန်သွားမှာပါ" လို့ သူက ဆိုပါတယ်။ "ကျွန်တော် အဲဒီကို နောက်ဆုံးအကြိမ် ရောက်ခဲ့တာ လွန်ခဲ့တဲ့ ၁၃ နှစ်ကပါ။ ကျွန်တော်နဲ့ ကျွန်တော့်လူတွေနဲ့အတူ သွားမှာပါ။ ကျွန်တော် ပညာသင်ယူခဲ့တဲ့ ကျွန်တော့်ရဲ့ ကျောင်းဟောင်းကို သွားကြည့်ချင်ပါတယ်။ ဒါဟာ အမှတ်တရကောင်းတစ်ခု ဖြစ်လိမ့်မယ်။" လို့ Van က ဆက်ပြီးပြောဆိုပါတယ်။

မလေးရှားနိုင်ငံက ဒုက္ခသည်ကလေးဘဝကနေ UFC ချန်ပီယံဖြစ်လာတဲ့ Van ရဲ့ ခရီးလမ်းဟာ မြန်မာနိုင်ငံက ပြည်ပရောက် မြန်မာတွေကြားမှာ နက်ရှိုင်းစွာ ပဲ့တင်ထပ်နေပြီး သူ့ရဲ့ ဇာစ်မြစ်အပေါ် ကတိကဝတ်ကလည်း လေးစားမှုကို ဆွဲဆောင်နေပါတယ်။

မြန်မာနိုင်ငံမှာ လူတွေစုဝေးပြီး Taira နဲ့ Van ရဲ့ ချန်ပီယံကာကွယ်ပွဲကို ကြည့်ရှုနေတဲ့ ဗီဒီယိုတွေ အွန်လိုင်းမှာ ရှိခဲ့ပါတယ်။ Van က TKO နဲ့ အနိုင်ရတဲ့အခါ သူတို့ အရမ်းပျော်ခဲ့ကြတာကို တွေ့ရပါတယ်။

Ref : New Straits Times. (2026, May 14). UFC champion Van reveals connection to Malaysia.