VOC/ June 4 2026

၂၀၂၆ ကမ္ဘာ့ဖလားကြီး စတင်ဖို့ နီးကပ်လာတာနဲ့အမျှ အမေရိကန် ပြည်ထောင်စု ကန်ဆက်စီးတီးမြို့မှာ အာဂျင်တီးနား ပရိသတ်တွေရဲ့ စိတ်လှုပ်ရှားမှုက အထွတ်အထိပ်ကို ရောက်နေပါပြီ။

မိုင်ပေါင်း ၁၀,၀၀၀ ကျော် ခရီးကြမ်းကို စက်ဘီးနဲ့ ဖြတ်သန်းလာခဲ့တဲ့ အာဂျင်တီးနား စက်ဘီးစီးသမား သုံးဦး မြို့ထဲကို ရောက်ရှိလာသလို၊ တစ်ပြိုင်နက်တည်းမှာပဲ ကမ္ဘာ့ကျော် စူပါစတား လီယွန်နယ် မက်ဆီ ဦးဆောင်တဲ့ အာဂျင်တီးနား လက်ရွေးစင်အသင်းကြီးလည်း ယခုသီတင်းပတ်အတွင်းမှာပဲ မြို့ကို ဆိုက်ရောက်လာလို့ ဖြစ်ပါတယ်။

မီဂွယ် ဆီလီယို၊ ယာမန်ဒူး မာတီးနက်ဇ် နဲ့ ဗီဆင့်တေး ကွန်ကူလီနီ ဆိုတဲ့ အာဂျင်တီးနား အမျိုးသား သုံးဦးဟာ သူတို့ရဲ့ မိခင်နိုင်ငံကနေ အမေရိကန်အထိ ၁၇ နိုင်ငံကို ဖြတ်သန်းပြီး စက်ဘီးနဲ့ ၁၀ လနီးပါး ကြာအောင် ခရီးနှင်ခဲ့ကြတာပါ။ သူတို့ရဲ့ မဆုတ်မနစ်တဲ့ အားထုတ်မှုကြောင့် CPKC ကွင်းအနီးက အာဂျင်တီးနားအသင်း တည်းခိုတဲ့ ဟိုတယ်ကို ရောက်ရှိတဲ့ နောက်ဆုံးခရီးစဉ်မှာ ဒေသခံ စက်ဘီးစီးဝါသနာရှင်တွေက ဝိုင်းဝန်းပြီး သောင်းသောင်းဖြဖြ ကြိုဆိုခဲ့ကြပါတယ်။

အလားတူပဲ၊ လက်ရှိ ကမ္ဘာ့ချန်ပီယံ အာဂျင်တီးနားအသင်းဟာလည်း အထူးအလှဆင်ထားတဲ့ အသင်းစီး လေယာဉ်ကြီးနဲ့ ကန်ဆက်စီးတီးကို ရောက်ရှိလာခဲ့ပါတယ်။ လက်ရှိချန်ပီယံဆုကို ဆက်လက်ထိန်းသိမ်းထားဖို့အတွက် ပရိသတ်တွေက လမ်းဘေးဝဲယာမှာ စုရုံးပြီး အားပေးခဲ့ကြတာပါ။

အာဂျင်တီးနားအသင်းဟာ သူတို့ရဲ့ ကမ္ဘာ့ဖလား အုပ်စုအဆင့် ပထမဆုံးပွဲစဉ်ကို ကန်ဆက်စီးတီးမှာပဲ အယ်လ်ဂျီးရီးယားအသင်းနဲ့ စတင်ရင်ဆိုင်သွားမှာဖြစ်ပြီး၊ ထို့နောက် သြစတြီးယား၊ ဂျော်ဒန်တို့နဲ့ ဆက်လက် ယှဉ်ပြိုင်ကစားသွားရမှာ ဖြစ်ပါတယ်။

သမိုင်းတစ်လျှောက်မှာ အအောင်မြင်ဆုံးနဲ့ ပရိသတ်အမာခံအများဆုံး အသင်းတွေထဲက တစ်သင်းဖြစ်ပြီး၊ ပြိုင်ပွဲသက်တမ်းတစ်လျှောက် ချန်ပီယံဆုကို ၁၉၇၈၊ ၁၉၈၆ နဲ့ မကြာသေးမီက ၂၀၂၂ ခုနှစ်တို့မှာ စုစုပေါင်း ၃ ကြိမ်တိုင်တိုင် ဆွတ်ခူးရရှိထားပါတယ်။

တစ်ဦးချင်းမှတ်တမ်းတွေမှာတော့ လက်ရှိအသင်းခေါင်းဆောင် လီယွန်နယ် မက်ဆီဟာ ကမ္ဘာ့ဖလားသမိုင်းတစ်လျှောက် အာဂျင်တီးနားအတွက် ဂိုးသွင်းအများဆုံး (၁၃ ဂိုး) အဖြစ် စံချိန်တင်ထားသလို၊ ပြိုင်ပွဲစုံ ၂၆ ပွဲအထိ ကစားပေးထားပြီး ကမ္ဘာ့ဖလား သမိုင်းတစ်လျှောက် ပွဲအများဆုံးကစားသမားအဖြစ်ပါ စံချိန်တင်ထားပါတယ်။

ယခု ၂၀၂၆ ပြိုင်ပွဲမှာတော့ မက်ဆီဟာ သူ့ရဲ့ ၆ ကြိမ်မြောက် ကမ္ဘာ့ဖလားပြိုင်ပွဲကို ကစားသမား ၂၆ ဦးပါ လက်ရွေးစငအသင်းနဲ့အတူပါဝင်ယှဉ်ပြိုင်တဲ့ အာဂျင်တီးနားအသင်းကို ချန်ပီယံဆု ကာကွယ်နိုင်ဖို့အတွက် ဆက်လက်ဦးဆောင်သွားမှာ ဖြစ်ပါတယ်။

Source: X