သီအိုဒို ရုစဗဲ့ရဲ့ ခြေရာကို လိုက်ခဲ့တဲ့ ထရမ့် — Freedom250 အထူးရထား၊ Rough Riders မြင်းစီးအဖွဲ့နဲ့ အမေရိကန် နှစ် ၂၅၀ ပြည့်အကြို သမိုင်းဝင်ခရီးစဉ်

VOC / International / July 2, 2026

အမေရိကန်နိုင်ငံ တည်ထောင်ခြင်း နှစ် ၂၅၀ ပြည့် အထိမ်းအမှတ်အကြိုအဖြစ် ဇူလိုင် ၁ ရက်နေ့မှာ သမ္မတ ဒေါ်နယ်ထရမ့်ဟာ မြောက်ဒါကိုတာပြည်နယ်၊ မီဒိုရာမြို့ရှိ သီအိုဒို ရုစဗဲ့ သမ္မတစာကြည့်တိုက် ဖွင့်ပွဲအခမ်းအနားကို တက်ရောက်ခဲ့ပါတယ်။

ဒီခရီးစဉ်ရဲ့ ထူးခြားချက်တစ်ခုကတော့ ထရမ့်ဟာ ကာတာတော်ဝင်မိသားစုက လှူဒါန်းထားတဲ့ တန်ဖိုး အမေရိကန်ဒေါ်လာ သန်း ၄၀၀ ခန့်ရှိတဲ့ Air Force One သမ္မတလေယာဉ်သစ်နဲ့ ပထမဆုံးအကြိမ် ခရီးထွက်ခဲ့တာ ဖြစ်ပါတယ်။

မြောက်ဒါကိုတာကို ရောက်ရှိပြီးနောက်မှာတော့ အမေရိကန်နိုင်ငံ တည်ထောင်ခြင်း နှစ် ၂၅၀ ပြည့် အထိမ်းအမှတ် Freedom250 အထူးရထား ကို စီးနင်းကာ သီအိုဒို ရုစဗဲ့ တစ်ချိန်က ရထားနဲ့ မကြာခဏ လာရောက်ခဲ့တဲ့ မီဒိုရာမြို့သို့ သမိုင်းဝင်ပုံစံနဲ့ ဝင်ရောက်ခဲ့ပါတယ်။

ရထားဆိုက်ရောက်ချိန်မှာ လူထုက “USA! USA!” လို့ အော်ဟစ်ကြိုဆိုခဲ့ကြပြီး၊ ရထားက ဆင်းပြီးနောက် သမ္မတထရမ့်ရဲ့ သမ္မတယာဉ်တန်းကိုတော့ သီအိုဒို ရုစဗဲ့ရဲ့ သမိုင်းဝင် Rough Riders မြင်းစီးတပ်ဖွဲ့ကို ကိုယ်စားပြု သရုပ်ဆောင်ထားတဲ့ မြင်းစီးအဖွဲ့က Cowboy ဦးထုပ်တွေ ဝတ်ဆင်ကာ မြင်းစီးလိုက်ပါ ဂုဏ်ပြုဦးဆောင်ခဲ့ပါတယ်။

Rough Riders ဟာ ၁၈၉၈ ခုနှစ် စပိန်–အမေရိကန်စစ်ပွဲအတွင်း သီအိုဒို ရုစဗဲ့ ကိုယ်တိုင် ဦးဆောင်ဖွဲ့စည်းခဲ့တဲ့ စေတနာ့ဝန်ထမ်း မြင်းစီးတပ်ဖွဲ့ဖြစ်ပြီး၊ တက္ကဆက်ပြည်နယ်က Cowboy တွေ၊ မွေးမြူရေးသမားတွေ၊ မိုင်းလုပ်သားတွေ၊ မုဆိုးတွေနဲ့ တက္ကသိုလ်အားကစားသမားတွေ ပါဝင်ခဲ့ကြပါတယ်။ အဲဒီစစ်ပွဲကပဲ ရုစဗဲ့ကို အမျိုးသားသူရဲကောင်းတစ်ဦးအဖြစ် ကျော်ကြားစေခဲ့သလို၊ နောက်ပိုင်းမှာ အမေရိကန်သမ္မတ ဖြစ်လာနိုင်ဖို့ အရေးပါတဲ့ အခြေခံလည်း ဖြစ်ခဲ့ပါတယ်။

ထရမ့်ကတော့ “ဒီနေ့ဟာ ဒီလေယာဉ်ရဲ့ ပထမဆုံးခရီးစဉ် ဖြစ်ပါတယ်။ ဒီလို ခေတ်မီတဲ့ လေယာဉ်မျိုးကို အမေရိကန်နိုင်ငံက ပိုင်ဆိုင်ထိုက်ပါတယ်” လို့ ပြောကြားခဲ့ပါတယ်။

ဒေသခံ သမိုင်းပညာရှင် ဝီလျံ ဟန်ဆတ်ကလည်း “ဒီလို အခမ်းအနားမျိုးကို မီဒိုရာမြို့မှာ တစ်ခါမှ မမြင်ဖူးသေးပါဘူး” လို့ ပြောကြားခဲ့ပါတယ်။

အမေရိကန်နိုင်ငံရဲ့ နှစ် ၂၅၀ ပြည့် အထိမ်းအမှတ်အကြိုကာလမှာ ပြုလုပ်ခဲ့တဲ့ ဒီခရီးစဉ်ဟာ သီအိုဒို ရုစဗဲ့ရဲ့ အမွေအနှစ်၊ အမေရိကန် အနောက်ပိုင်း Frontier စိတ်ဓာတ်နဲ့ နိုင်ငံရဲ့ သမိုင်းအစဉ်အလာကို ပြန်လည်အမှတ်ရစေတဲ့ သင်္ကေတဆန်တဲ့ အခမ်းအနားတစ်ခုအဖြစ် မြင်တွေ့ခဲ့ရပါတယ်။

#Trump #TheodoreRoosevelt #Freedom250 #RoughRiders #AirForceOne #America250 #NorthDakota #VOCNews #InternationalNews