ခါမ်းပါတ်မြို့ကို အကြမ်းဖက်စစ်တပ်က ပြန်လည်ထိန်းချုပ်

VOC/ June 20, 2026

အိန္ဒိယ-မြန်မာနယ်စပ်ကုန်သွယ်ရေးလမ်းကြောင်းပေါ်က ခါမ်းပါတ်မြို့ကို အကြမ်းဖက်စစ်တပ်က ဒီကနေ့ ဇွန်လ ၂၀ ရက်နေ့မှာ ပြန်လည်ထိန်းချုပ်လိုက်ပြီလို့ အကြမ်းဖက်စစ်တပ်ကထုတ်ပြန်ပါတယ်။

ကလေး-တမူး ကားလမ်းပေါ်မှာတည်ရှိပြီး အချက်အချာကျတဲ့ ခါမ်းပါတ်မြို့ကို အမျိုးသားညီညွတ်ရေးအစိုးရ NUG နဲ့ မဟာမိတ်ပူးပေါင်းတပ်ဖွဲ့တွေက ၂၀၂၃ ခုနှစ် နိုဝင်ဘာ ၇ ရက်နေ့က သိမ်းပိုက်ပြီး ထိန်းချုပ်ထားတာဖြစ်ပါတယ်။

သို့သော်လည်း အကြမ်းဖက်စစ်ခေါင်းဆောင်မင်းအောင်လှိုင် မေလကုန်ပိုင်းက အိန္ဒိယနိုင်ငံကိုသွားရောက်ပြီးနောက်ပိုင်း ဇွန်လ ၇ ရက်နေ့ကစပြီး ခါမ်းပါတ်မြို့ကို ကလေး နဲ့ တမူးမြို့ဘက်ကနေ နှစ်ဖက်ကြားညှပ်ပြီး စစ်အင်အားအလုံး အရင်းဖြင့် ထိုးစစ်ဆင်ခဲ့တာဖြစ်ပါတယ်။

အကြမ်းဖက်စစ်တပ်ဟာ ခါမ်းပါတ်မြို့ကိုပြန်ရဖို့ ကလေးမြို့ကနေ စစ်ကြောင်းတစ်ကြောင်း၊ မော်လိုက်မြို့ဘက်ကနေ စစ်ကြောင်းတစ်ကြောင်း နဲ့ တမူးမြို့ဘက်ကနေ စစ်ကြောင်းတစ်ကြောင်းဖြင့် ထိုးစစ်ဆင်ခဲ့ပြီးနောက် ဒီကနေ့ ဇွန်လ ၂၀ ရက်နေ့မှာ ခါမ်းပတ်မြို့ကို ပြန်လည်ထိန်းချုပ်နိုင်ခဲ့တာလို့ သိရပါတယ်။

လက်ရှိမှာတော့ ကလေး - တမူးလမ်းတလျှောက် ခွန်မွန်းနွမ်၊ နန်မွန်းတား၊ ရန်ငြိမ်းအောင်၊ မင်းသမီး၊ ကနန်၊ ဘုက္ကန်၊ ခါမ်းပါတ်၊ ဖက်ယားရေရှင်၊ ကျွန်းတောရေရှင်၊ ဝိတုတ်၊ ရန်မျိုးအောင်၊ ကြံစက်ကုန်း၊ ကြက်ဖနက်၊ ကံသာယာ၊ ကံကြီး၊ ရာဇဂြိုဟ်၊ ပြည်တော်သာ၊ နန်းစောင်းပု၊ ၅၆ မိုင် စတဲ့ ကျေးရွာ ၅၀ ကျော်က ပြည်သူတွေဟာ ဘေးလွတ်ရာကို ထွက်ပြေးတိမ်းရှောင်နေကြရတယ်လို့သိရပါတယ်။