ကရင်နီဒေသက မူကြိုကျောင်းကို စစ်တပ်က ဒရုန်းဖြင့်တိုက်ခိုက်၊ ကလေးငယ် ၂ ဦးသေဆုံး

VOC/ June 25, 2026

ကရင်နီပြည်၊ နန်းမယ်ခုံမြို့နယ်ထဲက မူကြိုကျောင်းတစ်ခုကို အကြမ်းဖက်စစ်တပ်က မနေ့က ဒရုန်းဖြင့် တိုက်ခိုက်ရာမှာ ကလေးငယ် ၂ ဦးသေဆုံးပြီး တစ်ဦးဒဏ်ရာရရှိခဲ့တယ်လို့သိရပါတယ်။

မနေ့ဇွန်လ ၂၄ ရက် မွန်းလွဲပိုင်း ၁ နာရီခန့်မှာ နန်းမယ်ခုံမြို့နယ်ထဲက မူကြိုကျောင်းတစ်ကျောင်းကို ဒရုန်းဖြင့်ပစ်မှတ်ထားတိုက်ခိုက်ခဲ့တာဖြစ်ပြီး အသက် ၆ နှစ်အရွယ်ယောကျ်ာလေးတစ်ဦး နဲ့ အသက် ၁၀ နှစ်အရွယ် မိန်းကလေးတစ်ဦးတို့ သေဆုံးခဲ့ပြီး အသက် ၆ နှစ်အရွယ်ကလေးငယ်တစ်ဦးမှာလည်း ဒဏ်ရာရရှိခဲ့တယ်လို့ The Coordination Team for Emergency Relief – CTER Karenni က ဒီကနေ့မှာသတင်းထုတ်ပြန်ပါတယ်။

CTER ရဲ့ဖော်ပြချက်အရ အကြမ်းဖက်စစ်တပ်ရဲ့ ပထမဆုံးဗုံးမှာ လယ်ကွင်းအနီးကျရောက်ခဲ့ပြီး အခြေအနေ အန္တရာယ် ရှိလာတာကို သတိပြုမိတာကြောင့် ဆရာ၊ ဆရာမတွေက ကလေးငယ်တွေကို ထွက်ပြေးပုန်းအောင်ရန်ပြောကြားခဲ့ပေမယ့် ဒရုန်းတိုက်ခိုက်မှုမှာ ကလေးငယ်တွေရှိရာကို ထိမှန်ခဲ့ပြီး ကလေးနှစ်ဦးမှာ သေဆုံးခဲ့ရတာလို့ သိရပါတယ်။

ဒါ့ပြင် မနေ့ည ၁၀ နာရီဝန်းကျင်မှာလည်း အကြမ်းဖက်စစ်တပ်က ကရင်နီပြည်၊ ဒီမောဆိုမြို့နယ်အနောက်ခြမ်းရှိ လွိုင်နန်းဖာကျေးရွာကို လေကြောင်းဖြင့် ထပ်မံဗုံးကြဲတိုက်ခိုက်ခဲ့တယ်လို့ ဆိုပါတယ်။